Бугунги кунда Ўзбекистон Республикасининг консуллик муассасаларида 90 минг нафарга яқин ҳамюртларимиз консуллик рўйхатида туришади. Бу ҳақда Ўзбекистон Ташқи ишлар вазирлигига асосланиб, 12news.ўз сайти хабар тарқатади.

Вазирликка кўра, “Фуқаролар мурожаатлари тўғрисида”ги қонун ижросини таъминлаш, қолаверса,  фуқаролар учун қулай муҳит яратиш мақсадида Ташқи ишлар вазирлиги Консуллик бошқармасида аҳоли турли маслаҳатлар беришга мўлжалланган сектор муваффақиятли иш олиб бормоқда. Ўтган йилнинг 9 ой давомида Ўзбекистон ҳудуди ва хориждан фуқаролар томонидан ўз ҳуқуқ ва манфаатларини ҳимоя қилишни сўраб, 1080 та мурожаат келиб тушган. Ушбу мурожаатлар ўз вақтида кўриб чиқилган ва тегишли чоралар кўрилган, дейилади ТИВ ахборотида.

The post 90 минг нафарга яқин ўзбекистонлик консуллик ҳисобида туради appeared first on Vatandosh.

Тожикистонда дунёга машҳур Facebook ижтимоий тармоғи республика ҳукумати ҳузуридаги Алоқа хизматининг буйруғи билан ёпиб қўйилган. “Соҳадаги фаолиятни тартибга солиш ваколатига эга органнинг норасмий буйруғи бизга СМС-хабар тарзида келган”, деб хабар беради Марказий Осиё янгиликлар портали маҳаллий провайдерлар вакиллари сўзларига таяниб.

Тожикистон интернет-провайдерлар уюшмаси ҳақиқатда ҳам шундай чеклов борлигини тасдиқлаган. Ҳозирча бу борада расмий хат олинмаган. Ҳозирда тожикистонликлар Facebookдаги ўз саҳифасидан фойдаланиш учун прокси-серверларни ишлатишмоқда.

Бу Тожикистон ҳукуматининг Facebookни ёпиш бўйича иккинчи уриниши бўлиб, биринчи марта жорий йил мартида ҳам шундай ҳаракат амалга оширилган эди. Бу чеклов орадан ўн кун ўтиб олиб ташланган эди.

Socialbakers сайти маълумотларига қараганда, Тожикистонда 41 минг нафардан ортиқ Facebook фойдаланувчилари бўлиб, бу кўрсаткич сўнгги олти ой ичида 25,6 фоизга ўсган.

The post Тожикистонликлар иккинчи марта Facebookсиз қолишди appeared first on Vatandosh.

Ўзбекистонда жами 1719,1 мингта автотранспорт воситаси бўлиб, уларнинг 12,4 фоизи табиий газ билан ҳаракатланади. Агар ҳозирги кундаги суръатда бу соҳани ривожлантириш чоралари кўрилса, 2016 йилга бориб, газ билан ҳаракат қиладиган автотранспорт воситаларининг сони 30 фоизга етади. Бу ҳақда 12news.uz сайти ёзади.

Бугунги кунда Ўзбекистонда автотранспорт воситаларига газ қурилмаларини ҳамда жойларда газ қуйиш шохобчаларини ўрнатиш бўйича Жанубий Корея ҳамда Хитой билан яқиндан ҳамкорлик қилиб келинади. Хусусан, кореялик бизнесменлар 50 та газ қуйиш шохобчасини қуриш учун Ўзбекистонга 42 миллион доллар миқдорида инвестиция киритишни кўзда тутмоқда.

Мутахассисларнинг ҳисоб-китоб қилишича, табиий газ билан ҳаракатланадиган транспорт воситалари атроф-муҳитга анъанавий ёқилғиларга қараганда 3-5 баравар кам зарарли тутун чиқаради.

Ўзбекистонда автотранспорт воситаларига табиий газ қурилмаларини ўрнатиш ва шу асосда ҳаракатлантириш кейинги йилларда жуда оммалашиб бормоқда. Бу, айниқса, бензин тақчиллиги кўп кузатиладиган вилоятларда тобора кенгаймоқда. У ўзининг арзонлиги билан, биринчи галда, ҳайдовчилар эътиборини тортмоқда.

The post 2016 йилга қадар Ўзбекистонда автотранспорт воситаларининг 30 фоизи табиий газ билан ҳаракат қилади appeared first on Vatandosh.

Осиё футбол конфедерациясининг Профессионал футбол қўмитаси йиғилиши якунига етди ва унда бир қатор масалалар кўриб чиқилди. Уларнинг энг сўнггиси ва муҳими — Осиё чемпионлар лигаси учун мамлакатларга ажратиладиган квоталар масаласи эди.

Йиғилиш якунида Ўзбекистон учун 2+1та ўрин бериладиган бўлди, деб хабар беради Стадион.ўз сайти. Бу сафар ҳам битта жамоамиз ўз иштирокини Шарқ минтақасида тўғридан-тўғри гуруҳ босқичидан бошлайдиган бўлди. Яна бир жамоамиз Ғарб минтақасининг гуруҳ босқичида ўз иштирокини бошласа, учинчи клубимиз иштирокни Ғарб минтақасининг саралаш босқичидан бошлайди.

ОФК Профессионал футбол қўмитасининг ушбу қарори 29 ноябрь куни бўлиб ўтадиган ОФК Ижроқўмида тасдиқдан ўтганидан кейин кучга киради ва у 2 йил давомида амалда бўлади.

The post Ўзбекистон учун ОЧЛга «2+1»та ўрин ажратилди! appeared first on Vatandosh.

Сайловлар тугади. Сайловчилар ўз сўзини айтиб бўлишди. Обама ғалаба қозонди. Демократлар Сенатда, республикачилар Вакиллар палатасида хўжайинлик қилишмоқда.

Энди баҳс-мунозарани бир четга суриб, амалий ишларга қўл урадиган пайт келди. Ҳарқалай Америка халқи шундай ўйламоқда. Америкаликлар кўнглида кечаётган фикр икки тарафга бўлиниб, масалага ёндашишни тўхтатишнинг вақти етиб келганини кўрсатади.

Айниқса, Оқ уй ва Конгресс ўртасида бюджетдаги тақчилликни ҳамда давлат қарзларини камайтириш борасидаги муросасиз тортишувлар мамлакат иқтисодиётини яна боши берк кўчага киритиб қўйишидан Америка жамияти жиддий ҳавотирланмоқда. Ҳар доим қарама-қарши фикрлар эга бўлиб келган америкаликларнинг барчаси иқтисодиёт истиқболи ноаниқ бўлиб қолаётганидан якдил ҳавотир билдиришмоқда. Иккала тараф ҳам ўз партиялари етакчилари танлаётган муроса йўлидан, чоралар мажмуидан норозилигини айтишмоқда.

Pew тадқиқот маркази томонидан ўтказилган ижтимоий сўров натижаларига кўра, респондентларнинг учдан икки қисми солиқлар оширилиши ва харажатларнинг кескин қисқартилиши иқтисодиётга катта таъсир кўрсатишини, 62 фоизи эса бу таъсир салбий бўлишини қайд этишган. Уларнинг аксарияти бу чоралар уларнинг шахсий турмушидан кўра Америка халқига жиддий таъсир кўрсатишидан ҳавотирланишини айтиб ўтишган.

Сўровда қатнашганларнинг ярмидан ортиғи Барак Обама ва республикачиларнинг Конгрессдаги етакчилари бюджетнинг янги режаси бўйича якдил қарорга келишига умид билдиришмаган. Республикачи респондентларнинг учдан икки қисми эса бундай келишувга эришиб бўлмаслигини айтиб ўтишган.

Респондентлар асосан иккита инқирозга қарши чорани қўллаб-қувватлашини айтишган. 64 фоиз иштирокчилар йиллик даромади 250 минг доллардан ошадиганлар учун даромад солиғини ошириш тарафдори бўлишса, 58 фоизи корпоратив солиқлар бўйича амалдаги таклифни маъқуллашади.

Сўровда қатнашганларнинг ярми мудофаа харажатлари қисқартирилишига, ижтимоий таъминот олиш ёшининг узайтирилишига ўз қаршилигини билдиришган.

Экспертлар давлат бюджети масаласида иккала партиянинг бундай муросасиз ва узоқдан-узоқ тортишувлари жамиятни бўлиб юбораётганидан ташвишга тушишмоқда.

Респондентларнинг 72 фоизи Обама, 67 фоизи эса республикачилар етакчилари мухолиф тараф билан муаммони ҳал этиш устидан ишлаши керак, деб ҳисоблайди. Республикачиларнинг ярми Конгресс Обамани қўллаб-қувватлаши керак, деб ўйласа, демократларнинг 54 фоизи Обама республикачилар билан бирга ишлашга ҳаракат қилиб кўриши керак, деб айтган.

Энг ёмони, респондентларнинг учдан икки қисми партиялараро муросасизлик ўзгаришсиз қолади, деб ҳисоблайди.

Умуман, фуқароларнинг кайфиятини таҳлил қилиб, шуни айтиш мумкин, Америка жамияти ҳақиқатдан иккига бўлинган. Мамлакат етакчилари ўртасида ёрқин етакчилик ва харизманинг етишмаслиги, қолаверса, аҳоли қатламлари ўртасидаги тафовутнинг жуда катта эканлиги, сиёсий қарашлар ва демогафиқ хилма-хиллик ҳам жамиятдаги бўлинишларга сабаб бўлмоқда. Айниқса, мамлакат раҳбарлари ўртасида принципиал масалаларда якдил ва жиддий қарор қабул қилиш масъулиятининг етишмаслиги, мамлакат тақдиридан кўра, популизм ва партия обрўсини ўйлашга кўпроқ урғу берилиши натижасида америкаликлар нафақат иккига бўлинишмоқда, балки уни бўлишга сиёсатчилар ҳам катта “хизмат қилишмоқда”.

The post Иккига бўлинган Америка: пароканда сиёсатчилар “иши”ми ёки сохта обрў натижаси? appeared first on Vatandosh.

Марказий Осиёнинг энг бой одамлари Ўзбекистон ва Қозоғистонда яшайди. Дунёдаги бой одамлар ҳақидаги “World Ultra Wealth Report” ҳисоботига тяаниб, ca-news.orgнинг хабар беришича, Қозоғистонда 30 миллион доллардан ортиқ маблағга эга 140 нафар киши бўлиб, уларнинг умумий бойлиги 20 миллиард долларни ташкил қилади. Ўзбекистонда эса бундай одамлар сони 80 киши бўлиб, уларнинг жами даромади 12 миллиард доллардан ошади. Тожикистонда эса 40 нафар кишининг жами фойдаси 6 миллиард доллар атрофида баҳоланган.

Ҳисоботда келтирилишича, Қозоғистонда бойлар сони камайиб бораётган бўлса, Ўзбекистонда уларнинг сони изчил кўпаймоқда. Ҳисобот муаллифлари Марказий Осиёда ялпи ички маҳсулот ўсиши барқарор 6 фоиздан юқори бўлиб қолаётганини эътироф этишган.

“World Ultra Wealth Report” жисмоний шахслар активларининг соф қиймати асосида тайёрланадиган ҳисобот бўлиб, у истисно тариқасида фақатгина 30 миллион доллар ва ундан кўп активларга эга шахслар ҳисобини юритиш орқали аниқланади. Бунда шахснинг хусусий, очиқ акциядорлик компаниялари, турар жойлари, кўчмас мулкка йўналтирган инвестициялари, санъат асарлари коллекцияси, самолёти, пул маблағлари ва бошқа активлари ҳисобга олинади.

The post Марказий Осиёнинг энг бой одамлари Қозоғистон ва Ўзбекистонда яшайди appeared first on Vatandosh.

Ўзбекистон миллий терма жамоаси ҳужумчиси Улуғбек Бақоев Қозоғистон чемпионатининг 2012 йилдаги энг яхши ўйинчиси сифатида тан олинди, деб хабар беради Ўзбекистон футбол федерацияси матбуот хизмати расмий сайти.

Ўзбекистон миллий терма жамоаси ва Қозоғистоннинг «Иртиш» клуби ҳужумчиси Улуғбек Бақоев, Sports.Kz интернет-нашри йил давомида Қозоғистон чемпионатида иштирок этувчи жамоаларнинг мураббийлари футболчилари ўртасидаги ўтказилган сўровнома якунига кўра, Қозоғистон Премьер-лигасининг 2012 йилдаги энг яхши ўйинчиси деб топилди.

Улуғбек Бақоев ўз фаолияти давомида тўрт марта (кетма-кет уч марта) Қозоғистон чемпионатининг энг яхши тўпурарига айланди. Икки йил давомида Бақоев тўрт марта ойнинг энг яхши ўйинчиси деб топилган бўлса, кетма-кет иккинчи йил Sports.Kz интернет-нашри томонидан таъсис этилган «Алмаз» соврини эгасига айланди. У сўровномада жами 131 очко тўплашга муваффақ бўлган ва энг яқин таъқибчиси – «Тобол»нинг 22 ёшли ярим ҳимоячиси Бауржан Жолчиевдан 35 очкога ўзиб кетган.

Сўровномада ғолиблик учун жами 121 нафар футбочли кураш олиб борган бўлиб, фаолиятини Қозоғистон чемпионатида давом эттираётган Ўзбекистон миллий терма жамоасининг бошқа аъзолари ҳам ундан ўрин олган. Хусусан, «Актобе» ҳужумчиси Марат Бикмаев умумий рейтингда 11- (29 очко), «Актобе» ярим ҳимоячиси Темур Кападзе 14- (25), «Актобе» ҳужумчиси Александр Гейнрих эса 27-ўринни (15 очко) эгаллаган.

Қайд этиш жоиз, Улуғбек Бақоев Қозоғистон чемпионатининг 2012 йилдаги энг яхши легионер футболчиси сифатида тан олинган бўлса, икинчи ўрин унинг терма жамоадаги шериги – Марат Бикмаевга насиб этган.

1978 йил 28 ноябрь куни туғилган Улуғбек Бақоев 2001 йил апрелидан буён Ўзбекистон миллий терма жамоасига жалб этиб келинади. Тажрибали ҳужумчи терма жамоадаги 11 йиллик фаолияти давомида 44 учрашувда майдонга тушган бўлиб, 12та гол уришга муваффақ бўлган. Жумладан, 2012 йилнинг 14 ноябрь куни ЖЧ-2014 саралаш босқичи доирасида Теҳронда Эрон терма жамоасига қарши ўйинда Бақоев томонидан урилган Ўзбекистон миллий терма жамоаси муҳим ғалабани келтирди.

The post Улуғбек Бақоев Қозоғистон чемпионатининг 2012 йилдаги энг яхши ўйинчиси деб топилди appeared first on Vatandosh.

Тошкентдаги Форумлар саройи залида Навоий номидаги Давлат академик катта      театрининг етакчи яккахон хонандаси, Ўзбекистон ва Қорақалпоғистон халқ артисти, халқаро танловлар  ғолиби Муяссар Раззоқованинг яккахон концерти бўлиб ўтди.

Унинг чиқиши опера санъати лосмандлари учун яна бир ҳақиқий совға бўлади, десак муболаға бўлмайди. Постановкачи режиссёр Андрей Слоним бошчилигидаги ижодий гуруҳ томонидан, Ўзбекистон Маданият ва спорт ишлари вазирлиги кўмагида тайёрланган катта композицияда хонанданинг ёрқин, таъсирчан истеъдоди тўлақонли намоён бўлди, деб хабар беради “Даракчи” газетаси.

Концертда хонанда ўзбек бастакорлари асарлари билан бир қаторда,  Ғарб-Европа бастакорлари қаламига мансуб машҳур опералардан арияларни ҳам ижро этди. Айниқса, Ринат Титеев, Шукур Ғафуров, Нормўмин Султонов, Руслан Гафаров ва театрнинг бошқа етакчи яккахонлари билан ижро этилган дуэт асарлар жуда илиқ кутиб олинди.

Концертда Жузеппе Вердининг «Травиата» операси учинчи қисмининг якуни ижро этилди, унда Виолеттанинг бош партиясини Муяссар Раззоқова айтди. Томошабинларнинг фикрича, симфоник оркестр, Навоий номидаги ДАКТ хори ҳамда дирижёрлари  Дилбар Абдураҳмонова, Анвар  Эргашев, Фазлиддин Ёқубжонов, Сулаймон Шодмонов, Содиқ Гаибов, Аида Абдуллаевалар ушбу асарларни юксак савияда ижро этиши ҳам концерт муваффақиятли чиқишига сабаб бўлди.

Муяссар Раззоқова аввал Франция, АҚШ, Германия, Россия, Италия ва бошқа давлатларнинг энг нуфузли саҳналарида томошабинларнинг олқишига сазовор бўлган.  Муяссар Раззоқованинг ўтган ҳафта охирида бўлиб ўтган концерти пойтахтимизнинг маданий ҳаётида энг катта воқеалардан бири бўлди, деб айтиш мумкин.

The post Муяссар Раззоқова Тошкентда концерт берди appeared first on Vatandosh.

Шундай инсонлар борки, улар умрини эзгу амалларга, хайрли ва савобли ишларга бағишлашади. Самарқандлик Мунира Маҳмудова ва унинг бир гуруҳ дўстлари ана шундай кишилардан.

Улар Нью-Йоркда яшаб туриб, ҳамюртларига яқиндан ёрдам қўлини чўзиб келишмоқда. Улар эҳтиёжманд ватандошларимизга яқиндан ёрдам бериб, кўплаб кишиларнинг кўнглини хушнуд айлаб келишар экан. “Ватандош” газетаси жамоатчи мухбирининг Мунира Маҳмудова билан суҳбати айнан шу ишлар хусусида борди.

 — Мунира опа, аввало, фаолиятингиз ҳақида сўзлаб берсангиз.

— Мен Самарқанд шаҳрида таваллуд топганман. Кўп йиллар шифокорлик қилганман. Ҳозирда Нью-Йоркда “Light of Hope. Inc” фирмасини ташкил қилиб, тўрт йилдан бери ногиронларга, беморларга моддий ва маънавий ёрдам кўрсатиб келамиз…

— Бу ёрдамлар ҳақида батафсил тўхталсангиз.

— Ўтган давр мобайнида шаҳримиз ногиронларига ва ижтимоий ҳимоя муҳтожларнинг бир қисмига ногиронлик аравачалари, турли асолар, болалар аравачалари, тўшакка ётиб қолган касаллар учун тиббий ва санитария воситалари, ногиронлар, ўзи ҳаракат қила олмайдиганлар учун турли тиббий воситалар, шу жумладан, тиббий кўрпа, кислород ёстиқлари ва балонлари ҳамда дори-дармонлар жўнатиб келамиз.

— Шу ўринда мана шундай кўмаклар қандай етказилаётгани хусусида ҳам айтиб ўтсангиз.

— Бизга кўплаб ўзбекистонликлар мана шундай беғараз юкларни ўз эгаларига етказишда яқиндан ёрдам беришади. Улар тегишли воситаларни йиғиш, жойлаш, қадоқлашга яқиндан кўмаклашишади. Албатта, аввалига бу ишларни амалга оширишда турли қийинчилик ва муаммолар пайдо бўлганди. Чунончи, юқорида кўрсатиб ўтилган буюмларни йиғиш, ташиш, уларни жойлаштириш, омборхона топиш, сифатини бузмаслик қадоқлаш керак бўлиб қоларди. Замирида савоб иш ётмайдими? Ишимиз ҳақида эшитиб, кўплаб кишилар бизга яқиндан ёрдам берадиган бўлишди. Омборхонани арзон нархда ижарага олдик, ёрдамчи йигит-қизларимиз сони 3-4 кишидан 20-25 нафарга кўпайди. Ишимизда самарадорлик ортди. Йигитларимиз юкларни ўз машиналарида аэропортга элтишади, у ердан терминалга тушириб, масъулларга топширишади.

Бу эзгу ишларни амалга оширишда Ўзбекистон Республикасининг Нью-Йоркдаги Бош консули Дурбек Амановнинг хизматини алоҳида айтиб ўтишни истардим. У билан бўлган мулоқотимиздан сўнг, жўнатиладиган юкларимизни расмийлаштиришни, “Ўзбекистон ҳаво
йуллари” МАК орқали бепул Ўзбекистонга олиб бориш, давлат божларидан озод қилиш ва бошқа расмий ишларни амалга ошириш учун Ўзбекистон ҳукуматига мурожаат қилиб, ишимизни жуда ҳам енгиллаштиришда катта ёрдам берди. Натижада, ҳар бир жўнатаётган юкларимиз ҳажми 2-3 тоннани ташкил қилмоқда.

Мен фурсатдан фойдаланиб Бош консулга ва бизга яқиндан ёрдам бераётган барча ташкилот ва муассасаларга ўз ташаккуримни айтишни, қолаверса, шу ёрдамлар етиб бораётган минглаб оилалар дуоси ва раҳматини етказишни истардим.

Баъзан бизнинг ёрдамдан баҳраманд бўлаётганлар миннатдорлигини кўриб, ниҳоятда қувонамиз, қилаётган ишимиздан қониқамиз, барча муаммо ва қийинчиликлар ёддан кўтарилади. Масалан, самарқандлик меҳнат фахрийси, тўқсон ёшни қоралаган отахона Абдужаббор Абдуқаҳҳоров икки йилдан бери қаттиқ касаллик чалинганман, дейди. “АҚШдаги ватандошларимиз томонидан менга икки хил ногиронлик аравачалари, ҳожат чиқарувчи мослама етказилди. Улардан фойданалардим, лекин бир йилки, тушакда ётиб қолдим, уйдагилар менга қарашяпти, шу билан бирга, мени ҳар ой гигиеник воситалар билан таъминлаяптилар. Шу ишни қилаётганларга минглаб раҳмат, қўллари дард кўрмасин, меҳнатларининг роҳатини кўрсин, доимо соғ юрсинлар, менга ва менга ўхшаган ногиронларга ёрдам қўлини чўзган ватандошларни ва мутасаддиларни қўл очиб, дуо қиламан”, деб ёзиб юборибдилар ўз мактубида.

— Мунира опа, юборилган юкларни “Ўзбекистон ҳаво йўллари” компанияси Самарқанд аэропортига етказиб беради, кейин бу юклар қандай беморларга тарқатилади?

 — Ёрдам юклари Самарқанд аэропортидан кейин шаҳардаги омборхонага жойлаштирилади. Ўша омбордан беморлар ва ногиронлар мурожаатига кўра, шифокор тавсияномаси асосида бепул уйларига етказиб берилади. Ўтган давр мобайнида Афғонистон уруши қатнашчиларига, “9-Меҳрибонлик уйи” тарбияланувчиларига, руҳий касалхона беморларига, шаҳарда муҳтож оилаларга, Тошкент, Бухоро ва Чирчиқ шаҳарларидаги эҳтиёжманд кишиларга ёрдам қўли чўзилди. Ҳозирда эса Самарқанд вилояти Оқдарё туманидан мурожаат қилган бир гуруҳ ногиронларга ёрдам кўрсатиш назарда тутилган бўлиб, тайёргарлик
кўрилмоқда.

— Мунира опа, кўп савоб ишлар қилаётган экансизлар, бу ишларни келгусида кенгроқ ёйишингизга тилакдошмиз. Режаларингиз тўғрисида ҳам айтиб ўтсангиз.

— Савоб кўп тармоқли иш. У ҳеч қачон тўхтаб қолмайд. Бировга яхшилик қилган, бировнинг ҳожатини чиқарган, бемору ногиронлар, кексаю қарияларнинг дуосини олган, кўпнинг хизматида бўлган мукофотини ва ажримини Худодан олади, дейди халқимиз. Насиб бўлса, бу хайрли ишимизни давом эттирамиз ва кенгайтирамиз. Чунончи, 2013 йил март ойида ўн нафар 10-16 ёшли
қулоғи яхши эшитмайдиган болаларни Нью-Йоркдаги касалхоналарнинг бирида текширтириб, уларни тегишли эшитиш воситаси билан таминлашни  режалаштиряпмиз.
Биз ҳам Мунира Маҳмудовани бундай эзгу ишларида қўллаб-қувватлаб, савоб ишни ҳар куни қилишга барча ватандошларимизни чақириб оламиз. Зотан, бундай эзгу амаллар беиз кетмайди.

Амиддин ФАЗЛИДДИНЗОДА.

The post Савоб ишни ҳар ким ҳар куни қилиши керак appeared first on Vatandosh.

Ўзбекистон Давлат санъат музейида “Нодир асарнинг қайта туғилиши” деб номланган битта картина кўргазмаси очилди. Унда буюк итальян рассоми Паоло Веронезенинг “Масиҳга аза тутиш” картинаси расмий тарзда тақдим этилди.

Веронезе картинаси топилгани ҳақида илк бор шу йилнинг октябрь ойи охирида хабар тарқаганди. Бундай баёнот беришга асарнинг ҳақиқий эканини тасдиқлаш бўйича икки йил олиб борилган ишлардан сўнг қарор қилинди. Айнан икки йил олдин реставратор Дилшод Азизов картинани тиклаш ишларини бошлаб юборди.

Олам.ўз сайтининг ёзишича, асарнинг ўзи кўп йиллар давомида музейда кўргазмага қўйиб келган, аммо унинг муаллифи номаълумлигича қолганди.

Рассом Собир Рахметовнинг сўзларига кўра, картина пойтахтдаги кўпгина рассомлик ўқув муассасалари учун қўлланма вазифасини ўтаган, талабалар жуда кўп бора ундан нусха кўчирган. “Олдимизда буюк итальян рассомининг ҳақиқий асари турганини ҳеч ким ҳатто хаёлига ҳам келтирмаганди”, – дейди Рахметов.

Картинани томоша қилиш учун кўплаб маданият арбоблари ва расмий шахслар тўпланди. Кўргазманинг очилиш маросимида Ўзбекистон Маданият ва спорт ишлари бўйича вазирининг биринчи ўринбосари Фотиҳ Жалолов, Италиянинг Ўзбекистондаги элчиси Риккардо Манара, Тошкент ва Ўзбекистон митрополити Викентий ва Давлат санъат музейининг директори Васила Файзиевалар қатнашди.

Маълум бўлишича, картина музейда князь Николай Константинович Романов туфайли пайдо бўлган. Айнан у 1886 йили ушбу санъат асарини Тошкентга олиб келади. 1917 йили князь ўзининг картиналар тўпламини Туркистон университетига васият қилиб қолдиради, 1920 йилда эса унинг базасида олдинига Марказий бадиий музей, кейинчалик Ўзбекистон Санъат музейи ташкил этилади. Шу тарзда картина музейга келиб қолади, аммо бугунгидай катта қизиқиш уйғотмайди.

Маълумки, Эрмитажда Веронезе мўйқаламига мансуб “Масиҳга аза тутиш” картинаси сақланади, аммо уларни таққослаганда ҳам картиналар бир-биридан нусха олмаганини, балки ягона Библия сюжетини акс эттирувчи тўлақонли мустақил асарлар эканини ишонч билан айтиш мумкин.

Атрибуциядан ташқари, Тошкент кимё институтида картинанинг рентген-тузилмали, инфрақизил ва ультрабинафша таҳлиллари ўтказилди. Уларнинг натижаларига кўра, картина бир неча бор реставрация қилинган, унда доғлар ва реставратор рассомларнинг “қўшимча чизмалари” борлиги аниқланган.

Бунинг устига картина тўлиқ ўлчамда тақдим этилмаган. Олдинлари реставрация пайтида рассомлар механик йўл билан бузилган жойларни олиб ташлашган. Хусусан, картинада Исонинг қўли “кесилган”. Картина ўзининг дастлабки кўринишида камида 20-30 сантиметр кенгроқ бўлган.

The post Ўзбекистонда нодир асар намойиши бўлиб ўтди appeared first on Vatandosh.

Ўзбекистон Республикасининг АҚШдаги фавқулодда ва мухтор элчиси Илҳом Неъматов Индиана университетида ташкил этилган “Ўзбекистон куни”да иштирок этди. У Ўзбекистон ҳақида тадқиқот олиб бораётган олимлар, ўзбек тилини ўрганаётган ёшлар билан учрашди.

Элчи жаноблари Ўзбекистон ҳақида фото-кўргазма ҳамда видео, миллий таомлар билан безатилган Индиана Мемориал Уюшмасида нутқ сўзлади. У, шунингдек, Санъат ва фан коллежи декани Ларри Сингел, университет ташқи алоқалар бўйича вице-президент Дэвид Зарет билан Тошкентдаги олий ўқув юртлари ҳамда Индиана университети ўртасида ҳамкорлик алоқаларини ўрнатиш масалалари бўйича мулоқот ўтказди.

“Биз мазкур университет билан илмий алмашув дастурини амалга оширишни ният қилганмиз. Бу ердан профессор-ўқитувчиларни Тошкентга юбориш, ўзбекистонлик профессорларнинг Индиана университетига келишини мақсадимиз мавжуд”, деди  у, жумладан.

Шуни алоҳида қайд этиш керакки, Ўзбекистон элчиларидан Илҳом Неъматов илк бор Индианага ташриф буюрди. Унинг айтишича, Америка халқини Ўзбекистонда кечаётган ўзгаришлардан хабардор бўлиши ўта муҳимдир.

“Мустақилликка эришганимизга ҳали кўп бўлмаган бир даврда Ўзбекистонда нималар юз бераётгани ва нималар амалга оширилгани хусусида билиш жуда фойдалидир”, деди Илҳом Неъматов.

Шундан сўнг ўзбек тилини ўрганаётган хорижлик талабалар ўз таҳсил олганлари асосида саҳна кўринишини намойиш этишган.

Шуни алоҳида қайд этиш керакки, Индиана университетининг Марказий Евроосиё тадқиқотлари бўлими сайтига кўра, ушбу университет АҚШда тўрт даражада ўзбек тилини ўргатадиган ягона маскандир.

“Мен айрим америкаликлар ўзбек тилида мулоқот қилаётганини кўриб, жуда ғурурланиб кетдим. Шу боис ҳам биз мазкур университет билан ҳамкорлик қилмоқчимиз”, деди элчи жаноблари.

The post Ўзбекистон элчиси Индиана университетига ташриф буюрди appeared first on Vatandosh.

Жаҳоннинг энг обрўли мусулмонларининг янги 500талик рўйхати эълон қилинди. 2012 йилги рейтингдан Ўзбекистон Мусулмонлар идораси раҳбари, муфтий Усмонхон Алимов ўрин олган. Алимов рейтингнинг «Диний ишларни бошқариш» туркумидан жой олган.

Kun.uz сайтида ёзилишича, Усмонхон Алимов “2006 йилдан бери Ўзбекистон муфтийси ҳисобланади. У ўзининг мўътадил нуқтаи назарлари ва Самарқанд вилоятига муфтийлик қилган давридаги ақидапарастларга қарши самарали кураши сабаб ҳурмат қозонган». «The Muslim 500»да ёзилишича, Усмонхон Алимов 2007 йилда Ўзбекистон пойтахти – Тошкент шаҳри Ислом Маданияти пойтахти деб топилишида муҳим роль ўйнаган.

Жаҳоннинг энг эътиборли мусулмонларининг 500талик рўйхати 2009 йилдан бери Иордания Қироллик стратегик ислом таълими маркази томонидан тузиб келинади. Муфтий Усмонхон Алимов 2009 йилдан бери рейтингдан мунтазам ўрин олиб келади.

Ўзбекистон Мусулмонлар идораси расмий сайти маълумотларига кўра, Усмонхон Алимов 1950 йил 1 январда Самарқанд вилоятида туғилган бўлиб, 1982-83 йилларда Бухородаги «Мир Араб» мадрасасида, 1983-87 йилларда эса Тошкент ислом институтида, 1989-90 йилларда Марокашдаги «Каравайин» университетида таҳсил олган. 1987-2000 йиллар давомида Пайариқ туманидаги «Имом Бухорий» масжидида имом-хатиб, 2000 йилдан эса Ўзбекистон Мусулмонлар идорасининг Самарқанддаги бош вакили вазифасида фаолият олиб борган. 2006 йил 8 август куни эса Усмонхон Алимов Ўзбекистон мусулмонлари идораси раиси, муфтий лавозимига тайинланган.

Алимовдан ташқари, жаҳоннинг энг эътиборли мусулмонларининг 500талик рейтингидан фақат битта ўзбекистонлик ўрин олган. 2009 йилги илк рейтингда Ўзбекистоннинг собиқ муфтийси, Шайх Муҳаммад Содиқ Муҳаммад Юсуф «Олимлар» туркумидан ўрин олганди. «У Ўрта Осиё Мусулмонлар идорасининг собиқ Бош муфтийси ва Ўзбекистонннинг мустақиллик давридаги биринчи Муфтийси ҳисобланади. У бутун Ўрта Осиё ва Россиядаги энг машҳур Ислом ёзувчиларидан биридир. У Ливияда таҳсил олган бўлиб, Қуръони Каримга жуда ҳам машҳур тафсир ёзган», – дейилади 2009 йилги рейтинг-нашрда.

The post Ўзбекистон муфтийси жаҳоннинг энг нуфузли 500 мусулмони қаторидан ўрин олди appeared first on Vatandosh.

Барак Обаманинг ҳокимият тепасига келиши, қолаверса, Хитойда коммунистик партия етакчиларининг янгиланиши ушбу икки гигант мамлакат ўртасидаги ҳамкорлик бўйича саволларни кўпайтирди, десак муболаға бўлмайди. Бугун икки мамлакат барча соҳаларда бир-бири билан рақобат қилмоқда, дунёда таъсир доирасини кенгайтириш бўйича изчил сиёсат олиб бормоқда. АҚШ иқтисодиёти гарчи мақтагулик ривожланиш кўрсаткичларига эга бўлмаса-да, дунё иқтисодиётида ҳал қилувчи ролини сақлаб турибди. Хитой эса йилдан-йилга ўз иқтисодий гегемониясини кенгайтириб бормоқда. Туфтс университети Флетчер мактаби профессори Бакшар Чакравортининг фикрича, бугун Америка Хитойдан инновация борасида жиддий қўрқиши керак.

Унинг фикрича, Америка ўз иқтисодиётининг истиқболи борасида мутлақо нотўғри муаммолар билан уралашиб қолган. Масалан, Америка Хитойга рақобатда енгилиб, кўплаб иш жойларидан маҳрум бўлаётгани хусусида тез-тез бонг урилмоқда. Пью тадқиқот маркази ўтказган таҳлилга кўра, 42 фоиз америкаликлар Хитой аллақачон дунёнинг энг йирик иқтисодиётига айланганини қайд этишган.

Аммо Оқ уй инновацияда рақобатга кўпроқ урғу бериши керак. Чунки бу Америка иқтисодиётини жонлантириши мумкин бўлган асосий тармоқлардан биридир, деб таъкидлайди профессор.

Шунинг учун, тадқиқотчининг фикрича, Америка Хитойнинг инновация бўйича олиб бораётган ишларига бошқача ёндашиши, яъни Хитой бўйича айрим афсоналарга ишониш керакмаслигини айтади

1.  Хитойда инновация йўқ, фақат қароқчилик ва кўчириш бор.

Жуда кўплаб инновациялар кўчиришдан бошланади. Америка ҳам кўҳна дунё олимлари ишларини кўчириш орқали кўплаб инновацияларга асос солган. Айни чоғда Alibaba, Tencent ёки Sina Weibo сингари хитойча “кўчириш”лар ҳам америкача вариантидан кўра мукаммалроқ бўлиб, уларнинг ҳар бири Хитой бизнеси ва истеъмолчилари учун муҳим бўлган муаммоларни ҳал этмоқда. Эътиборли жиҳати, улар глобал бозорга чиқишга ҳам жуда тайёр

2.   Хитойда инновацияларнинг аксарияти “тепадан” чиқади. Ваҳоланки, энг яхши инновациялар қуйида туғилади.

Хитой давлати 2020 йилга қадар мамлакатни инновацион маконга айлантириш йўлида изчил фаолият олиб бормоқда. Америка ҳам ўз вақтида инновацияларни қўллаб-қувватлаган. Агар АҚШ мудофаа вазирлиги ҳарбий лойиҳаларни молиялаштирмаганида, бугун интернет ҳақида бирор нарса дейиш мумкинмиди? Йўқ, албатта. Давлат фундаментал тадқиқот ва инновацияларни инвестиция ва бошқа йўллар билан қўллаб-қувватлаш чораларини кўриши керак. Буни мобиль, интернет лойиҳалари мисолида ҳам кўриш мумкин. Афсуски, бугун АҚШ ҳукумати томонидан бундай лойиҳаларни қўллаб-қувватлаш кўлами бирмунча пасайган.

 3. Хитойда интеллектуал мулк ҳуқуқи муҳофазаси инновацияларни рағбатлантириш даражасида кучли эмас.

Хитойнинг кучсиз интеллектуал мулк ҳуқуқи инновация ривожи учун муҳим омил бўлмоқда, дейиш ҳам мумкин. Албатта, интеллектуал мулкдан фойдаланиш ва уни ҳимоялаш ўртасида мувозанат бўлмоғи лозим. Лекин Американинг кучли интеллектуал мулк бўйича қонунлари инновациялар ривожига рағбатлантирувчи эмас, балки тўсиқ бўлаётган омиллардан бири, десак муболаға бўлмайди.

4. Глобаллашган иқтисодиётда барқарор инновация халқаро миқёсда инвестиция ётқизишни талаб қилади. Хитойнинг имижи ва хориждаги фаолияти кучсиз ва анча эскиргандир.

Чегара ва ҳудудий тортишувлар, қолаверса, савдо балансидаги номутаносибликларга қарамасдан Хитойнинг тез ривожланаётган давлатларга, чунончи, Афика, Лотин Америкаси ва Шарқий Осиёга йўналтираётган инвестицияси ва таъсири АҚШникига қараганда тез ўсмоқда. Хитой компаниялари маҳаллий бозор талабларига мослашувчанлиги билан ташқи бозорларга чуқур кириб бормоқда. Гап Лотин Америкаси ёки Африка билан алоқалар ҳақида кетганда, шубҳасиз, Хитой бир қадам олдинда эканлигини таъкидлаш жоиз.

5. Хитойнинг таълим тизими ўрганишга қаратилган, у инновациялар яратишга қодир эмас.

Гап таълим тизими ҳақида кетганда, бу жуда ҳам ножўя айб, деб айтиш мумкин. Бугун АҚШ иқтисодиёти фан, технология, муҳандислик ва математика йўналишларида кадрларга жиддий эҳтиёж сезаётгани ҳеч кимга сир эмас. Силикон водийси мутахассисларининг қарийб ярми иммигрантлар эканлиги ҳам бу фикрнинг нечоғли тўғри эканлигини кўрсатади.

Албатта, Хитойнинг инновациялар борасида фаолиятини янада яхшилаш учун кўп иш қилиниши керак. Аммо Хитой бу борада мунтазам ўрганиб бораётгани, АҚШ ташлаётган қадамларни олдиндан илғаб, тегишли чоралар кўраётгани бор гап.   Тўғри, инсониятга глобал ўргимчак тўрини АҚШ мудофаа вазирлиги берди, аммо компасс бундан неча минг йил аввал хитойликлар томонидан кашф этилганини унутмаслик керак, деб хулоса қилади Бакшар Чакраворти.

The post АҚШ ва Хитойнинг “совуқ уруши”. Инновация ҳақидаги беш афсона appeared first on Vatandosh.

O’zbekistonning AQShdagi Favqulodda va Muxtor elchisi Ilhom  Ne’matov 2012-yil 26-noyabrda AQShning Indiana shtati Blumington shahridagi Indiana universitetiga tashrif buyurdi. Ilhom Nematov AQSh tarixida Indiana universitetiga tashrif buyurgan birinchi O’zbekiston elchisi bo’ldi. Bu tashrif universitetning Markaziy Yevro-Osiyo ta’limi fakultetining “Ozbek tili” dasturi va “O’zbek talaba va olimlari uyushmasi” tarixi lavhalariga  muxrlandi.

Bu tadbir nafaqat AQShning Indiana universitetida o’zbek tili va ma’daniyatini targ’ib qilishda faol ish olib borayotgan o’zbekistonlik va amerikalik mutaxassislar  uchun, balki o’zbek tili va uning tarixi, madaniyati va adabiyotini o’rganayotgan  amerikalik hamda boshqa millat talabalari uchun katta ahamiyatga ega edi. Jumladan, O’zbek tili dasturining  rahbari va o’zbek tili o’qituvchisi  Malik Xo’jaev va shu universitetda o’zbek tili va madaniyatini targ’ib qilish uchun AQSh tomonidan Fulbrayt granti bilan taqdirlangan Mufarrah Musayeva boshchiligidagi bir soat davom etgan suhbat darsida Ilhom Ne’matov amerikalik talabalarning o’zbek xalqi, tili va  madaniyatiga bo’lgan qiziqishlari hamda o’zbek tilida mukammal darajada suhbat qurishlarining guvohi bo’ldi. Shuni ta’kidlash joizki, darsda Indiana universiteti talabalari bilan birgalikda masofada o’zbek tilini o’rganayotgan Michigan universiteti talabalari videokonferensiya  orqali aloqaga chiqdilar. Bundan ta’sirlangan Ilhom To’ychievich suhbat darsi so’ngida Indiana va Michigan universiteti talabalarining til va madaniyat bilim darajalarini yuqori baholadi va kelajakdagi ishlariga muvaffaqiyatlar tiladi. Bu iliq suhbatdan so’ng Ilhom Ne’matov O’zbek talaba va olimlar uyishmasi prezidenti Umida Hikmatillaeva va uyushma a’zolari  bilan uchrashdi.

Shuningdek, Ilhom Ne’matov universitetning Markaziy Yevro-Osiyo ta’limi fakultetining rahbari Kristofer Atvud va Markaziy Osiyoshunos professor William Firmen shu qatorda San’at va Ilm Oliy maktabining  rahbari Lerri Singel, Indiana universiteti Xalqaro  vitse prezidenti Devid Zarret, Xalqaro tadqiqot va rivojlanish vitse prezidenti Charli Rifsnider va Xalqaro hamkorlik  vitse prezidenti Shovn Reynoldslar  tomonidan iliq kutib olindi. Ular bilan uchrashuvda O’zbekiston poytaxti Toshkent oliy o’quv yurtlari va Indiana universtitetilarida tahsil olish imkoniyatlari haqida so’z yuritildi. “Biz bu universitet bilan tajriba almashuv dasturlari tuzilishi tarafdorimiz”, dedi O’zbekiston elchisi. “Biz bu yerdan bir necha professorlarni Toshkentga yuborishni, shuningdek Toshkentdagi olimlarimizni Indianaga yuborishni istaymiz.”

Uchrashuv dasturida Ilhom To’ychiyevichning Akrom Habibullaev tarafidan Indiana universitetining “Vels” kutubxonasidagi o’zbek resurslari bilan tanishtirilishi alohida ahamiyatga ega. Bundan tashqari elchi janoblariga Nigora Azimova tomonidan hozirgi kun til o’rganish talablariga to’liq javob beradigan zamonaviy yangi innovatsion usullar asosida yozilgan 1 va 2-bosqich O’zbek tili hamda Rahmonxo’ja Imomxo’jaev tomonidan yozilgan Pashtu va Gulnisa Nazarova tomonidan yozilgan Uyg’ur kitoblari sovg’a sifatida taqdim etildi.

Elchi janoblari tashrifiga uyushtirilgan maxsus qa’bulda 150 dan ortiq Indiana universiteti talaba, olim va xodimlari ishtirok etishdi. Eng muhimi, O’zbekistonning AQShdagi elchisi Ilhom Ne’matovning qisqa satrdagi mazmunga boy ma’ruzasidan mehmonlar ko’p ma’lumotga ega bo’lishdi. Maruzadan so’ng har kim O’zbekiston haqida turli xil savollar bilan elchi janoblariga murojaat qildi va savollariga to’liq va qoniqarli javob olganidan juda mamnun bo’ldi. Ma’ruzadan so’ng o’zbek tilining 1 va 3-bosqichida o’qiyotgan Markaziy Yevro – Osiyo ta’limi fakultetining amerikalik magistr talabalari: Kristofer Sorensan, Elliot Nyuton va Kreg Perri elchi janoblariga yuzlanib o’zbek tilida chiroyli nutq so’zlab, O’zbekiston va Amerika aloqalari yanada mustahkamlashishini tilab, amerikalik talabalar o’zbek tilini O’zbekistonda o’rganish imkoniyatiga ega bo’lsin deya o’z istaklarini bildirdilar.

Qabul dasturida mehmonlar elchixona xodimlari: Nurilla Abdullayev va Farhod Fayzillaevlar tomonidan uyushtirilgan foto va video ko’rgazmani katta qiziqish bilan tamosha qilishdi hamda o’zbekistonlik mohir oshpaz Qahramon Alimov va shu yerda istiqomat qiluvchi Sharbat Habibullaeva va Shohsanam Usmonova tomonidan tayyorlangan o’zbek milliy taomlari dasturxonidan bahra olishdi.

Indiana universitetining magistr talabasi va O’zbek talaba va olimlari uyushmasining vitse prezidenti Mahmuda Saydumarova Fulbrayt grant sohibi Mufarrah Musayevani sahnaga taklif qilgach, Yalla guruhi tomonidan kuylangan o’zbek milliy xalq qo’shig’i “Omon yor” yangradi. Shuningdek, Jekob musiqa bilim yurtining aspirant talabasi atoqli musiqachi professor Menahem Preslerning shogirdi va 2012 yilning Motsart konsert musobaqasining g’olibi, 1-o’rin sohibi o’zbekistonlik Gulrukh Shokirova o’zi bastalagan musiqiy ijod namunalari bilan barchani hushnud qildi.

Bu tadbirni uyushturishda qo’llab-quvatlagan va har tomonlama yordam bergan “Osiyo va Ural milliy resurslari  markazi” va Markaziy Yevro-Osiyo ta’limi fakultetiga alohida minnatdorchilik bildirildi.

Mufarrah Musaeva,

Fulbrayt grant sohibi va Markaziy Yevro-Osiyo talimi

fakultetining magistr talabasi va o’zbek tili o’qituvchisining assitenti.

Malik Xo’jayev,

Markaziy Yevro-Osiyo talimi

fakultetining o’zbek tili o’qituvchisi.

The post O’zbekistonning AQShdagi elchisi Indiana universitetiga tashrif buyurdi appeared first on Vatandosh.

 30 ноябрь куни Тошкентдаги «Пахтакор» марказий стадионида 2012 йилги Ўзбекистон Кубоги финал учрашуви бўлиб ўтди. «Бунёдкор» ва «Насаф» ўртасидаги ўйинда тошкентлик футболчилар 3:0 ҳисобида ғалаба қозонишди.

2012 йилги Ўзбекистон Кубоги финали «Бунёдкор» учун тарихдаги бешинчи, «Насаф» учун эса учинчи финал эди. «Бунёдкор» бунгача икки марта – 2008 ва 2010 йилги мавсумларда Кубок баҳсларида ғолиб чиққан бўлса, Қашқадарё клуби 2003 ва 2011 йилларда Кубок финалига қадар етиб келган, бироқ ҳар иккала сафар ҳам Тошкентнинг «Пахтакор» клубига 1:3 ҳисобида имкониятни бой берганди.

Бу йилги Кубок финали, 2012 йилги мавсумни Осиё Чемпионлар Лигаси гуруҳ босқичи ўйинлари билан бошлаган ҳар иккала жамоа учун ҳам муҳим аҳамиятга эга эди. ОФК Ижроқўми 2013 йилги Осиё Чемпионлар лигасида Ўзбекистонга 2+1 кўринишида ўрин ажратгани сабаб, Ўзбекистон Кубоги финал ўйини аҳамияти янада ошиб кетди. Агар ўйин «Бунёдкор»нинг ғалабаси билан якунига етса, Миржалол Қосимов шогирдлари келаси йил Чемпионлар лигасини тўғридан-тўғри гуруҳ босқичидан бошлаш имконига эга бўлишарди. Агар ўйин «Насаф»нинг ғалабаси билан якунига етса, жамоа ОЧЛ-2013 гуруҳ босқичи йўлланмасини ҳам қўлга киритар, «Бунёдкор» эса ОЧЛнинг плей-офф баҳсларида гуруҳ босқичи йўлланмаси учун кураш олиб бориши керак бўларди.

Бундан ташқари, Ўзбекистон Кубоги финали 2011 йилни камида битта соврин билан якунлаган ҳар икки жамоа учун 2012 йилги мавсумда бирор бир совринни қўлга киритиш учун сўнгги имконият эди. Бир йил аввал «Бунёдкор» Ўзбекистон чемпионати баҳсларида ғолиб чиққан бўлса, «Насаф» ОФК Кубогида ғолиб чиқиб, Осиё миқёсида чемпионликни қўлга киритган Ўзбекистоннинг илк клубига айланган эди.

2012 йилги Ўзбекистон Кубоги финал учрашуви «Насаф»нинг ҳужумлари, жамоа футболчилари – Кенжа Тўраев, Шоҳруҳ Гадоев ва Фозил Мусаевнинг хавфли зарбалари билан бошланганига қарамай, «Бунёдкор»нинг йирик ҳисобли ғалабаси билан якунига етди. Ўйиннинг 13-дақиқасида «Насаф» ҳимоячиси Шавкат Раимқулов ўз жарима майдончаси ичида тўпни «Бунёдкор» ҳужумчиси Шавкат Саломовга олдириб қўйиши ва ўз дарвозабони – Мурод Зуҳуровни қийин аҳволга солиб қўйиши натижасида, ҳисоб очилди.

Биринчи бўлим якунига етгунича эса «Бунёдкор» ўйин ғолиби масаласини амалда ҳал қилиб қўйди. 35-дақиқада Акмал Шораҳмедовнинг ўнг қанотдан узатган заргарона тўп узатишидан сўнг Камолиддин Мурзоев бош билан «Насаф» дарвозасини аниқ нишонга олган бўлса, биринчи бўлим якунланиши арафасида «Бунёдкор» сардори Виктор Карпенко жамоадоши, учрашувнинг энг фаол ўйинчиларидан бири бўлган Шавкат Саломовнинг жарима зарбасидан узатган пасидан сўнг ҳисобни йирик кўринишга келтирди.

Иккинчи бўлим «Насаф» ташаббуси остида ўтди. Бахтга қарши, Рўзиқул Бердиев қатор хавфли ҳужумлар, кучли зарбаларни йўллаганликларига қарамай, ўйинда бурилиш ясай олишмади. Аксарият вазиятларда қашқадарёлик футболчилар якуний зарбани беришда аниқлик ва тезкорлик етишмаган бўлса, камида 3та вазиятда «Бунёдкор» дарвозабони Игнатий Нестеров ўз маҳоратини кўрсатишга мажбур бўлди.

Шундай қилиб, Ўзбекистондаги 2012 йилги футбол мавсумига расман якун ясаб берган Ўзбекистон Кубоги финалида «Бунёдкор» ғалаба қозониб, ўз тарихида учинчи марта Ўзбекистон Кубогини қўлга киритди.

Ўзбекистон Кубоги-2012. Финал учрашуви
30 ноябрь, жума

«БУНЁДКОР» (Тошкент) – «НАСАФ» (Қарши) 3:0 (3:0)

ГОЛЛАР: Шавкат Саломов (18), Камолиддин Мурзоев (35), Виктор Карпенко (44).

ОГОҲЛАНТИРИШЛАР: Артём Филипосян (13), Лутфулла Тўраев (25), Дилшод Жўраев (88) – Фозил Мусаев (19), Илҳом Юнусов (48).

«БУНЁДКОР»: Игнатий Нестеров, Акмал Шораҳмедов, Хайрулла Каримов, Анвар Ғофуров, Жавлон Иброҳимов (Дилшод Жўраев, 69), Шавкат Саломов, Лутфулла Тўраев, Артём Филипосян, Камолиддин Мурзоев (Анваржон Солиев, 77), Жасур Ҳасанов, Виктор Карпенко (Алибобо Раҳматуллаев, 71).

«НАСАФ»: Муроджон Зуҳуров, Шавкат Раимқулов (Александар Петрович, 46), Мақсуд Каримов, Ботир Қораев, Кенжа Тўраев, Артур Геворкян, Иван Бошкович (Санжар Баратов, 80), Фозил Мусаев, Шоҳруҳ Гадоев, Мирзакамол Камолов (Фаррух Сайфиев, 58), Илҳом Юнусов.

ҲАКАМЛАР: Равшан Эрматов, Маъмур Саидқосимов, Жаҳонгир Саидов, Шуҳрат Пўлатов (барчаси – Тошкентдан).
Тошкент, «Пахтакор» стадиони. 5270 томошабин.

Сурат муаллифи – Ҳасан Пирмуҳамедов.
Манба: www.pfl.uz

The post «Бунёдкор» ўз тарихида учинчи марта Ўзбекистон Кубоги соҳибига айланди appeared first on Vatandosh.

Бокс бўйича оғир вазндаги собиқ жаҳон чемпиони ўзбекистонлик Руслан Чагаев 1 декабр куни Германиянинг Дюсселдорф шаҳрида германиялик турк Ёқуб Соғломга қарши рингга тушади.

Чагаев Ёқуб Соғлом билан жанг қилишини ўз веб саҳифасида эълон қилди.

- Мухтарам мухлислар, мен Ёқуб Соғлом билан рингда жанг қилишимни веб саҳифам орқали сизларга маълум қиламан. Ўйлайманки, менга зафар ёр бўлади. Жанг 1 декабр куни Дюсселдорф шаҳрида бўлиб ўтади.

Ўтган ҳафта Руслан Чагаев 1 декабр куни Дюсселдорфда уюштирилаётган бокс шоуси доирасида кубалик оғир вазндаги боксчи Майк Пересга (18-0, 12 КО) қарши рингга тушиши эълон қилган эди.

Бироқ 25 ноябр куни Чагаев-Перес жанги қолдирилгани хабар қилинди.

Халқаро спорт нашрларига кўра, жанг қолдирилишига Майк Перес елкасидан жароҳат олгани сабаб бўлган.

Германиянинг Хан Реннерод шаҳрида яшаётган 35 ёшдаги Ёқуб Соғлом Туркиянинг Асрин шаҳрида туғилган. У ўзбекистонлик бокс ишқибозларига яхши таниш эмас.

2006 йилдан бери профессионал бокс билан шуғулланиб келаётган Соғлом 2008 йилда Германия Бокс уюшмасининг оғир вазндаги чемпионлик камарини қўлга киритган.

Ёқуб Соғлом шу кунгача 29 та жанг ўтказиб унинг 28 тасини ғалаба билан якунлаган, битта жангда ютқазган. 28 та ғалабадан 25 тасини нокаут билан ютган.

Fightnews.ru хабарига кўра, Соғлом охирги марта 2011 йил 9 апрел куни жанг қилиб бешинчи раундда техник нокаут билан ютган.

33 ёшдаги Руслан Чагаев эса профессионал рингда 30 та жанг ўтказиб, 27 тасини ғалаба билан якунлаган, иккита жангда ютқазган, битта жанг дуранг билан тугаган. Чагаев 27 ғалабадан 19 тасини нокаут билан якунлаган.

Руслан Чагаев 2009 йил июнида WBO, IBF, IBO тоифалари бўйича жаҳон чемпиони украиналик боксчи Владимир Кличкога техник нокаут билан ютқазган.

2011 йил август ойида Чагаев россиялик Александр Поветкинга очколар бўйича бой берган.

Руслан Чагаев охирги учта жангни ғалаба билан якунлади.

Чагаев 2012 йил 28 январ куни тринидад-ва-тобаголик рақиби Кертсон Мансвеллни, 21 апрел куни америкалик боксчи Билли Зумбрунни ва 1 сентябр куни германиялик Вернер Крейскоттни мағлуб қилган.

The post Бугун Руслан Чагаев Ёқуб Соғломга қарши рингга тушади appeared first on Vatandosh.

28 ноябрь куни Ўзбекистон Президенти Ислом Каримов Европа Иттифоқининг ташқи ишлар ва хавфсизлик сиёсати бўйича Олий вакили, Еврокомиссия вице-президенти Кэтрин Эштонни қабул қилди.

Ўтган йиллар давомида турли соҳаларда ўзаро алоқаларни ўрнатиш бўйича улкан тажриба тўпланди, икки томонлама ва кўп томонлама тузилмалар кўринишидаги ҳамкорликнинг мустаҳкам институционал базаси яратилди.

2011 йил январдаги Ўзбекистон ва Европа Иттифоқи раҳбарларининг олий даражадаги учрашуви, унинг натижалари бўйича имзоланган ҳужжатлар ўзаро муносабатларни сифат жиҳатдан янги даражага олиб чиқди. Ўтган йили ўзаро товар айланмаси 19% га ошди ва 2 млрд. 360 млн. долларни ташкил этди. Бу йил ҳам ижобий тенденция сақланиб қолмоқда. Шунингдек, томонларнинг ўзаро савдони диверсификациялаш шароитларини яхшилаш устидаги ишларни ўзаро келишилган ҳолда давом эттиришга, Ўзбекистонда Европа капитали учун қулай инвестиция шароитини янада кенгайтиришга, мавжуд ресурслар ва илғор технологиялар асосида ҳамкорликдаги лойиҳаларни амалга оширишга тайёрлиги тасдиқланди.

Европа Иттифоқи ташқи сиёсий хизматининг раҳбарини қутлар экан, давлатимиз раҳбари мазкур учрашув Ўзбекистон ва ЕИ ўртасидаги муносабатларнинг ҳолатини муфассал таҳлил қилиш, ҳамкорликни ривожлантиришнинг устувор йўналишларини белгилаш учун яхши имконият эканини қайд этди.

Давлат ва нодавлат ташкилотлари ўртасида маданий-гуманитар, илмий-таълим ва бошқа соҳаларда тўғридан-тўғри алоқаларни ушлаб туришдан иккала томон ҳам манфаатдор эканлиги қайд этилди.

Учрашувда, шунингдек, долзарб минтақавий муаммолар, Марказий Осиёда хавфсизлик ва барқарорликни таъминлашнинг алоҳида масалалари, шу жумладан, Афғонистондаги вазиятнинг ривожланиши билан боғлиқ масалалар муҳокама қилинди, дея хабар беради “Ахборот” информацион дастури.

Кэтрин Эштон самимий қабул ва икки томонлама муносабатлар, кун тартибининг муҳим халқаро ва минтақавий масалалари бўйича муфассал ва конструктив фикр алмашишга яратилган шароитлар учун Ислом Каримовга миннатдорчилик билдирди.

The post Кэтрин Эштон: ЕИ Ўзбекистон билан узоқ муддатли муносабатларни йўлга қўйишдан манфаатдор appeared first on Vatandosh.

Американинг Red Mountain Energy Corporation компанияси “Олмалиқ кон-металлургия комбинати” ОАЖдаги кислород станциясини модернизация қилади.

Red Mountain Energy Corporation ва ОКМК кислород станциясини тўкис топшириш шарти билан қиймати $19 млн.лик модернизация қилиш ишлари бўйича шартномани имзолашди.

Лойиҳа доирасида қўшимча ускуналарни ўрнатиш режалаштирилмоқда, бу станциянинг унумдорлигини 20% га ошириш, яъни йилига 131,4 млн.м кубгача техник кислородни ишлаб чиқариш имконини беради.

Модернизациялаш доирасидаги қурилиш ишлари ОКМКнинг ўз кучи асосида амалга оширилади. Лойиҳа икки йил давомида амалга оширилади, деб ёзади UzDaily.

Умумий қиймати $26,2 млн.лик лойиҳа Ўзбекистон тикланиш ва тараққиёт жамғармасининг $19 млн. миқдоридаги кредити ҳамда ОКМКнинг $7,2 млн. миқдордаги ўз маблағлари ҳисобидан молиялаштирилади.

The post Америка-Ўзбекистон. Америка компанияси ОКМКдаги кислород станциясини модернизация қилади appeared first on Vatandosh.

 Қадимий Термиз шаҳри ўрнида юнон-буддизм услубига оид фризнинг бир қисми топилди

Шимолий Бақтрия ўзбек-француз археологик миссияси 2012 йил октябрида тош билан қуришда фойдаланиладиган оқ оҳактошдан тайёрланган ва жуда яхши ҳолатда сақланган горельефни топди.

Бўйи 40 см га яқин бўлган ушбу ажойиб ҳайкалча Қадимги Термиздаги Чингиз тепалигида жойлашган ибодатхонани безаб турган (Б бино) юнон-буддизм фризининг бир қисми ҳисобланади. Унда юнон, ҳинд ва бақтрия маданиятларини бирлаштирувчи услубда ясалган бадавлат эркак ва аёлни ажратиш мумкин.

The post Қадимий Термиз шаҳри ўрнида юнон-буддизм услубига оид фризнинг бир қисми топилди appeared first on Vatandosh.

Яқинда Ўзбекистон Алоқа ва ахборотлаштириш агентлигида “Корея телеком” корпорациясининг президенти ва бош ижрочи директори жаноб Ли Сук Чо бошчилигидаги делегация билан учрашув ўтказилди.

“Корея телеком” делегациясининг ташрифи шу йилнинг сентябрь ойида мамлакатимиз Президентининг Корея Республикасига давлат ташрифи чоғида эришилган келишувларнинг амалдаги ижроси ҳисобланади. Алоқа ва ахборотлаштириш соҳасида икки давлат ўртасидаги ҳамкорлик давлатлараро, ҳукуматлараро ва идоралараро имзоланган ҳужжатлар асосида амалга оширилади.

Учрашувда телекоммуникациялар ва ахборот-коммуникация технологияларининг энг янги йўналишларида икки томонлама ўзаро манфаатли ҳамкорлигини янада ривожлантириш масалалари муҳокама қилинди. Томонлар телекоммуникация технологияларини ривожлантиришнинг истиқболли йўналишлари бўйича ўзаро фикр алмашдилар.

Ўзбекистон-Корея ҳамкорлигининг юқори даражасини қайд этган ҳолда, “Корея Телеком” корпорацияси вакиллари Ўзбекистонда янги симсиз технологияларни жорий этиш йўли билан ўзларининг бу ердаги фаолиятини кенгайтириш истаги ва ниятларини билдиришди.

“Корея Телеком” корпорациясига 1982 йили асос солинган. Бугунги кунда “Корея Телеком” Осиёдаги энг йирик телекоммуникация операторларидан бири ҳисобланади. Корпорацияга маҳаллий, шаҳарлараро ва халқаро алоқа хизматларини тақдим этувчи Кореядаги энг йирик ва технологик бой бўлган телекоммуникация тармоғи тегишли, дея хабар беради ЎзААА матбуот хизмати.

The post “Корея Телеком” Ўзбекистонда янги симсиз технологияларни жорий этмоқчи appeared first on Vatandosh.